BIR PLETOK MINUMAN KHAS BETAWI

Namenye 'Bir Pletok', kate Babe Ane “minuman nyang satu entu udeh lame banget tesohor di kalangan betawi, malahan mungkin ampe mancanegare (hehehe... cume becande). Ceritanye pade jaman penjajah Belande tuh Kompeni–kompeni pade demen banget ame minuman nyang namenye Bir, katenye sih buat ngangetin badan tau deh rasanye kaya ape Babe juga ampe giniari masing penasaran men bae agame ngelarang, sebab entu minuman kan ade alkoholnye. Entakanu akhirnya warge betawi kaga keabisan akal buat nandingin entu bir dengan rupe ame rase nyang same tapi kaga ade alkoholnye, entakanu dibikinlah minuman pake bahan dari rempah-rempah berupe jahe, kayu manis, serei, dan beberape bahan lainnye. Buat ngewarnainnye biar mirip ame bir beneran makanye dikasih datuh kayu secang. Nah akhirnye jadi deh minuman nyang bisa dibilang rase ame rupanye mirip bir beneran, makanye dinamain datuh 'Bir pletok' nyang terkenal ampe sekarang”.

Ape sebab name bir buatan betawi ade buntut “pletok”nye..? entu karne waktu direbusnye bebunyi pletok-pletok, atawe bisa juge dibilang karne kalo nyiapinnye pake batu es yang ditaro di gelas bambu, entakanu di kocok-kocok atawe digoyang-goyang jadi berbusa ame ngeluarin bunyi "pletok-pletok", pokonye kire-kire begitu deh. Selaen nyegerin ame ngangetin, bir pletok juga bae buat ngelancarin peredaran darah. Emang sih kalo baru pertame minum lidah ngerasa aneh rasanye rada-rada pedes gitu, entakanu lame-lame rasanye jadi nikmat bin enak banget, tapi buat kebanyakan orang betawi nyang paling penting kaga mengandung alkohol.

Kalo jaman sekarang rasa-rasanye rada susah buat ngedapetin orang nyang ngejual bir pletok biar kata entu bukan berarti kaga ade, karne konon kabarnye masing bisa tuh kita temuin di kisaran setu babakan, cidodol, tangerang, juga di beberape wilayah lainnye. Buat Abang None atawe Enya Babe nyang mao ngerasain boledeh tuh langsung nyelonong ke sane, atawe kalo kaga bikin aje kendiri lagian kaga suseh buat ngedapetin bahan-bahannye entakanu ganpang juga cara bikinnye alias kaga pake repot. Kalo kate Enya Aye ada beberape gaye resep nyang rada laen antara nyang atu ame nyang laennye. Entu kaga ngape-ngape sebab inti dari rasanye kaga jauh beda, justru entu malah bagus buat ngejadiin rase bir pletok semakin kaye. tinggal kite aje mao pake nyang mane.

Kebetulan banget Enya Aye lagi bikin bir pletok tuh di dapur, Ane intip dulu ye biar ngarti care bikinnye :

Bahan-bahannye berupe :

1. 1½ liter air.
2. 150 ml gula pasir
3. 1 batang kayu manis
4. 3 batang serai
5. 50 gram jahe, kupas, geprak-geprak (memarkan).
6. 1 gegem kayu secang
7. ½ sdt garam
8. 1 sendok kopi bubuk.

Cara bikin-nye :

• Rebus air ampe mendidih, entakanu cemplungin datuh kayu manis, serai, kopi bubuk, jahe ame kayu secang, godog ampe bebau sedep.
• Entakanu cemplungin gula pasir ame garam, kecilin api, godog lagi ampe 15 menit lamanye, angkat.

Bir Pletok ini bisa disajiin panas atawe dingin tinggal seragemin aje ame selera Abang None (diminum anget-anget bakalan lebih nikmat). Tapi kudu diinget nih ame Abang None, kalo udah jadi bir pletoknye jangan lupe kirim-kirim gitu hehehe..Ane cuma becande. “ Kalau Wajan gantinya kuali, buat masakin ikan betok. Kalau lagi hujan begini, enaknya minum bir pletok “.